無掩雞籠
普天之下，邊間機構，面對職位申請人，無學歷要求？無技能證明？無入息紀錄？無年齡限制？無醫療檢查？無良民證？無擔保人？連審批權都無？直頭係無掩雞籠，每日150名額，不問情由，來者不拒？
無論公司係蚊型或巨無霸，都深明一個簡單道理，辦公室對比員工數目好細，無咁多座位坐，無咁多升降機上落，無咁多醫療資源照顧生老病死，無咁多福利資源供書教學，一濶三大，連垃圾桶、蒸餾水，廁格、尿兜、巡樓、掃地、換燈或維修都成問題。
請咁多新員工，邊個部門或團體最得益？畫公仔唔需要畫出腸，之唔係明明唔關佢事，偏偏自告奮勇幫新人適應新環境嘅路人甲團體囉，人生路不熟，最緊要搵番支盲公竹，教佢哋申請乜申請物，但問題係，僧多粥少，遲早彈盡糧絕，一齊攬炒。
歸根結底，請人唔係大晒，認識皇親國戚更加唔係大晒，人多好辦事係徹頭徹尾錯嘅，自由聘請招攬訓練新人至係關鍵所在，令公司各方面慢慢壯大，明白人力物力服務嘅供應都有上限，急速擴張預示咗急速滑落，我以為呢個係常識，平常不過，黑白分明，點知時興膠層點紅點綠，指鹿為馬，將儲儲埋埋嘅公司信譽，一舖清袋，面對呢啲咁無能嘅膠層，扺所有人睇佢哋唔起。
如果無大大支鎗對住，或者無咗啲好大喜功嘅膠層，一個正常嘅機構，會點做呢？穩中求勝？摸住石頭過河？抑或繼續騎牆？定係落閘放狗？
Search